نن د استرالیا او هندوستان تر منځ لومړۍ یوه ورځنۍ سیالي پای ته ورسیده. دغې لوبې کې استرالیا د هندوستان په وړاندې په پنځو ویکټو ماتې وخوړه.
هندۍ لوبډلې د لوبې پچې ګټلو سره د توپ وهنې پریکړه وکړه. هندوستان د روهېت شرما او ویراټ کولي غوره توپ وهنې په مرسته په پنځوسو اورونو کې درې لوبغاړي له لاسه ورکولو سره ۳۰۹ منډې جوړې کړې.
د هندوستان لپاره روهېت شرما په ۱۶۳ توپونو د دیارلسو څلوریزو او اوو شپږیزو په مرسته ۱۷۱ منډې جوړې کړې او د لوبې تر پایه ناسوځیدلی پاتې شو. ویراټ کولي هم دغې لوبې کې ۹۱ منډو جوړولو سره ښه وځلید.
د استرالیا لپاره فالکنر دوه او هذلووډ یوه ویکټه واخیسته. فالکنر خپل لسو اورونو کې ۶۰ او هذلووډ خپل لسو اورونو کې ۴۱ منډې ورکړې.
د استرالیا لوبډلې ټاکل شوی هدف په ۴۹.۲ اورونو کې د سمیت او بیلي پیاوړې توپ وهنې سره پوره او د هندوستان لوبډلې ته په پنځو ویکټو ماتې ورکړه.
د استرالیا لوبډلې لپاره سمیت په ۱۳۵ توپونو د یولسو څلوریزو او دوو شپږیزو په مرسته ۱۴۹ او بیلي په ۱۲۰ توپونو د اوو څلوریزو او دوو شپږیزو په مرسته ۱۱۲ منډې جوړې کړې.
د هندوستان لپاره بریندر سېران تر ټولو بریالی توپ اچوونکی ثابت شو. بریند سران خپل ۹.۲ اورونو کې ۵۶ منډو ورکولو سره درې ویکټې واخیستې.
