يوې نوې څېړنې څرگنده کړې ده، چې کوم کسان چې سره له دې چې نښې نښانې يې د رک روغ انسان وي او زړه ته دا وېره ور لوېدلې وي، چې ده کې کومه ناروغي شته، درې اويا سلنه يې د زړه په ناروغۍ د اخته کېدو امکان شته.
د ناروې په بيرگن پوهنتون کې د شوې څېړنې څېړونکي وايي، دغه نوی کشف به ډاکټران د هغو ناروغانو د درملنې د غوره لارو چارو په اړه حيران کړي، چې د ناروغۍ هيڅ نښه نښانه پرې نه شته، خو هسې په دې اړه اندېښمن دي.
څېړنه کې دې ته اشاره شوې، چې د روغتيا په اړه اندېښنه د زړه د ناروغيو د راپيدا کېدو ستر لامل دی. دغه څېړنه له اوو زرو پر ډېرو کسانو شوې ده، چې عمرونه يې له پنځوسو کلونو پورته دي. څېړنه کې د هغوی د روغتيا، د ژوند کولو طريقو او د دوی د تشويش او انديښنو څارنه شوې ده.
د څېړنې پايلو ښودلې، چې تجربه کې چې د تشويش يا د روغتيا په اړه د اندېښنې له کبله د کومو کسانو لوړه کچه ثبت شوه، د زړه په نارغيو د اخته کېدو امکان يې نږدې دوه برابره ډېر و. دې کې د هغوی نورو روغتيايي ظروفو، خوراکي نظام او سگرټ څکولو ته هم کتل شوي دي.
څېړنو څرگنده کړه، چې نورو لاملونو ته په کتو کوم کسان چې د خپلې روغتيا په اړه اندېښمن وو، د هغو په نسبت درې اويا سلنه ډېر د زړه د ناروغيو له گواښ سره مخ وو، چې په ذهني ډول له خپلې روغتيا ډاډه وو.
