وسله والو طالبانو وړمه شپه د فارياب خواجه سبز پوش ولسوالۍ کې پر گڼو امنيتي پوستو بريدونه کړي، چې له امله يې امنيتي ځواکونو ته مرگ ژوبله اوښتې ده.
د خواجه سبز پوش ولسوالۍ امنيه قوماندان محمد هاشم باتور وايي، چې دغه بريدونه همهالي وو او لسگونو طالبانو په کې برخه اخيستې وه. ولسوال جگړه کې د پوليسو د يوه افسر او د اربکيانو د يوه قوماندان د وژل کېدو پخلی کړی. نوموړی وايي، جگړه کې د امنيتي ځواکونو يو ټانک هم سوزېدلی دی.
د سيمې خلک وايي، چې طالبانو ماښام مهال د خواجه سبز پوش لويه لار وتړله او اته بجې يې بريدونه پيل کړل، چې تر نيمې شپې روان وو.
طالبانو لا د دغو جگړو په اړه څه نه دي ويلي.
