صادق خان وتوانېد تېره شپه د ټاکنو په ګټلو سره د لندن ښار لومړنی مسلمان ښاروال وټاکل شي.
خان د یوې خیاطې مور او موټرچلوونکي پاکستاني پلار یو له اتو بچیانو څخه دی.
صادق د لېسې له وخته چې ایله د پنځلسو کالو و له کارګر ګوند سره یې سیاست ته مخه کړه. وايي، سیاست سره یې لېوالتیا د لېسې د مدیر پوروړې ده چې هغه هم په لندن کې د لېسې لومړنی مسلمان مدیر و. ښاغلی خان وايي، د ښوونځي مدیر ورسره مرسته وکړه چې پوه شي «د پوټکي رنګ او توکم د هغې لارې خنډ نه شي کېدای چې انسان غواړي ترلاسه یې کړي».
صادق خان په لومړیو کې غوښتل د غاښونو ډاکټر شي؛ خو د استاد په لارښوونه یې حقوق ولوستل.
صادق خان ژمنه کړې چې ښاروالۍ به د ټولو لندنیانو لپاره وي او ښار ته به ټولنیز عدالت راوړي.
صادق خان د بریا له اعلان وروسته چې وینا یې په ژوندۍ بڼه لندن کې خپرېده وویل، د نابرابرۍ پر ضد به مبارزه کوي او د لندنیانو لپاره به ژوند بې له دې چې څوک دي او څه تاریخچه لري، بهتره کړي.
