موږ د نړیوالتوب په پېر کې ژوند کوو، له گڼو پردیو ژبو سره مخ کېږو او اړتیا ده چې له خپلې مورنۍ ژبې پرته باید نورې ژبې هم زده کړو. د نننۍ نړۍ انسانان کوښښ کوي چې د خپلې مورنۍ ژبې تر څنگ پر انگریزۍ، فرانسوي او یا هم عربي ژبو د خبرو کولو توان ولري. د نوو ژبو زدهکړې کې د ګرامر تر څنګ د لغاتو ذخیره هم ډېره مهمه وي او د دې ذخیرې جوړول بیا ډېرو ته ستونزمن کار برېښي. له لاندې لارو چارو نه په ګټې اخیستلو سره تاسو کولای شئ چې د نورو ژبو لغات په اسانۍ سره زده کړئ:
• انتخاب
د لغاتو پر ځای انتخاب ډېر مهم وي. هره ژبه په زرونو نوي لغات لري، موږ باید د ټولو لغاتو د زدهکړې لپاره کوښښ ونه کړو یوازې هغه لغات زدهکړو چې زموږ په ورځني ژوند کې ډېر کارېږي. د ډېر کارېدونکو لغاتو زدهکړه د انسان لپاره اسانه وي.
• نښلونه
نوي لغات باید له جملو څخه واخلو او پوه شو چې چېرته کارېږي، که چېرې لغات په یوازې توگه زدهکړو نو بیا ډېر ژر هېرېږي او په ذهن کې نه پاتې کېږي. دا هم مهم دی چې نوي لغات باید د انسان له تېرو خاطراتو سره ونښلول شي او دا بیا د انسان په ذهن کې د تل لپاره پاتې کېږي.
• تکرار
نوي لغات باید د انسان په ژوندانه کې تکرار شي له تکرار پراته د انسان ذهن نوي لغات هېروي.
• لیکل
لغات یوازې په ویلو د انسان په ذهن کې نه پاتې کېږي. پخوا رومیانو متل کاوه چې له خولې څخه وتلي لغات الوځي او بېرته نه راگرځي خو لیکل شوي بیا تر مرگه ژوندي پاتې وي. د نوي لغاتو لیکل د انسان په ذهن کې تر ډېره پاتې کېږي.
• کارول
د لغاتو کارول د لغاتو د زدهکړې لپاره ډېر مهم دي. د لغاتو د زدهکړې لپاره دا تر ټولو مهم اصل دی، که چېرې د نوي ژبې زدهکوونکي لغات ونه کاروي نو ډېر ژر به یې هېر کړي.
