د ولسمشر غني لومړی مرستيال جنرال عبد الرشيد دوستم وايي چې د افغانستان د ملي امنيت شورا يې د ترهګرۍ پر ضد د مبارزې مخه نيسي. ده ويلي چې د ملي امنيت شورا کې «ځينې کسان» يې د ترهګرۍ پر ضد د فعاليتونو مخه نيسي.
سپوږمۍ راډيو راپور ورکوي د ولسمشر لومړی مرستيال جنرال دوستم دغه څرګندونې په جوزجان کې کړي دي. جنرال دوستم وايي جوزجان ته د ترهګرۍ د فعاليتونو د مخنيوي له پاره تللی دی.
دوستم په خپلو خبرو کې د ملي امنيت شورا ځينو غړو ته په اشاره ويلي: «دوی ډارېږي چې جنرال دوستم به یو ګوند وځپي او جنبش به غښتلی کړي، خو زما په صداقت نه پوهېږي».
د جنرال دوستم له فعاليتونو څخه د جمعيت اسلامي غړي، په ځانګړې توګه په شمال کې د بلخ سمبال چاری والي، عطا محمد نور وېره لري، تر څو په راتلونکي کې هغوی ته ستونزه جوړه نه کړي.
