افغان چارواکو پرېکړه کړې ده، چې له وسله والو طالبانو سره به د سولې خبرې اترې قطر کې کوي. دغه خبره پاکستانۍ ورځپاڼې اکسپرېس ټريبيون د افغان چارواکو له خولې ليکلې ده.
د افغانستان د بهرنيو چارو وزارت سياسي معين حکمت خليل کرزي پاکستاني پلاوي سره گډه غونډه کې ويلي: «د قطر پلازمېنه دوحه کې د طالبانو د غورځنگ استازيتوب د خبرو اترو بشپړه قانوني مرجع ده. په دې پړاو کې د «قطر دفتر» زموږ د علاقې وړ دی». ښاغلي کرزي دا څرگندونې په داسې حال کې کړي، چې افغان حکومت پخوا قطر کې د طالبانو دفتر په رسميت نه پېژاند. خو طالبانو ويلي و، يوازې د قطر له لارې به د افغانستان د کړکېچ د حل لپاره کېدونکو هڅو کې گډون وکړي.
د بهرنيو چارو وزارت سياسي معين زياته کړې، افغان حکومت د قطر دفتر د طالبانو هغه ډله مشروع بولي، چې د تېرې جون مياشت کې يې ملا اختر محمد منصور د خپل مشر په توگه وټاکه او د هغه پيروي کوي. «افغان چارواکي د قطر دفتر په رسميت پېژني او طالبان حق لري خبرو کې د حقاني شبکې کسان وړاندې کړي».
د ملي يووالي حکومت حقاني شبکه له خپلو پياوړو مخالفينو شمېري او د راپورونو پر اساس افغانستان کې د ډېری زورورو بريدونو کار د همدې شبکې د جنگيالو پر غاړه دی.
يادې پاکستانۍ ورځپاڼې پرون د ولسمشر د يوه سلاکار ښاغلي قطب الدين هلال له خولې ليکلي وو، چې ملي يووالي حکومت د طالبانو يوازې له څو شرطونو پرته نور ټول منلي، څو د سولې خبرو اترو ته کښېني.
طالبانو لا په دې اړه رسنيو ته څه نه دي ويلي.
