د ملي يووالي حکومت ځينې چارواکي په دې اند دي، چې هېواد کې روانه خرابه امنيتي وضعه د امريکا له متحده ايالاتو سره د امنيتي تړون د لاسليک پايله ده.
د پخواني ولسمشر دويم مرستيال په داسې حال کې چې د امنيتي وضعيت په اړه خپله اندېښنه څرگندوي، ويسا ورځپاڼې سره خبرو کې ويلي، چې امريکا سره د امنيتي تړون لاسليک د وضعيت له ښه والي سره هيڅ مرسته نه ده کړې.
نوموړي د ولسمشر غني او اجرايه رييس ډاکټر عبد الله تر منځ اختلافاتو ته په اشاره ويلي، چې حکومت يې له ټاکنو وړاندې بحراني حالت ته رسولی، په داسې حال کې چې د دې حکومت دوه کاله پوره کېږي.
هغه نيوکه کړې، چې د ملي يووالي حکومت چارواکي تر اوسه په خپل منځ کې د هوکړه ليک په عملي کولو نه دي توانېدلي.
ښاغلی خليلي چې اوسمهال د سولې شورا لومړی مرستيال دی، ټينگار کوي، چې له وسله والو طالبانو سره هم د حزب اسلامي غوندې بين الافغاني مذاکرات وشي، ځکه بهرنيان افغانانو ته سوله نه شي راوستلی.
تېره ورځ د ولسي جرگې غړي مولوي تره خېل هم څرگنده کړې وه، چې هېواد کې خراب امنيتي حالات امريکا سره د امنیتي تړون پايله ده او بايد له سره په دې تړون غور وشي.
خو افغانستان کې مېشت بهرني ځواکونه بيا د امنيتي گډوډۍ پړه ټوله پر افغانانو اچوي. تېره ورځ د دغو ځواکونو عمومي قوماندان جنرال نيکولسن رسنيو سره خبرو کې وويل، چې د افغان امنيتي ځواکونو د تلفاتو او د طالبانو د بريدونو د ډېرېدو ستر سبب د امنيتي ځواکونو د رهبرۍ کمزوري ده.
هغه زیاته کړه، چې له هغه وروسته چې جگړه کې يې د ځواکونو واک پراخ شو، شاوخوا اته سوه هوايي بریدونه يې افغانستان کې کړي، چې په ترڅ کې يې زرگونه بمونه ورولي دي.
