د افغانستان د ملي امنيت پخواني سلاکار رنگين دادفر سپنتا ويلي دي، چې امريکا نړۍ کې د شاتگ په حال کې ده.
نوموړي دا خبرې هرات کې د امنيتي خبرو اترو په پينځمه نړيواله غونډه کې کړې دي. دې غونډه کې د نړۍ د نږدې شلو هېوادونو استازو گډون درلود.
د غونډې ډېری گډونوالو څرگنده کړه، چې د نړۍ زبر ځواکونه افغانستان کې د رقابتي جگړو د پيلولو په حال کې دي، چې دا کار د سيمې د هيڅ هېواد په گټه نه دی.
د ملي امنيت پخواني سلاکار څرگنده کړه، چې د سعودي، قطر او عربي اماراتو په گډون د نړۍ ستر ځواکونه افغانستان کې د ترهگرو ډلو ملاتړ کوي او دا چاره په يوه ورځني کار بدله شوې ده.
د هغه په وينا دغه هېوادونه افغانستان کې ترهگرۍ سره د مبارزې په پلمه د ترهگرۍ ملاتړ کوي، چې زیان يې ټول د افغانستان خلکو ته دی.
د غونډې گډونوالو د سيمې پر هېوادونو غږ وکړ، چې په گډه د سيمې د امنيت لپاره کار وکړي.
افغانستان کې وروستيو بدلونونو ته په کتو د چارو شنونکي اندېښنه څرگندوي، چې دغه هېواد به په راتلونکې کې د نړۍ د سترو ځواکونو او حريفو هېوادونو تر منځ د نيابتي جگړې پر ډگر بدل شي، چې امريکا، روسيه، چين، هندوستان، پاکستان، سعودي او ايران په دغو هېوادونو کې يادېږي.
