له بغلان څخه خپاره شوي راپورونه وايي چې د ملي اردو پوستې په پرله پسې توګه سقوط کوي او طالبان هره شېبه پر ولايت لا ډېر واکمنېږي.
د طلوع نيوز سيمه ييز ژورنالېست حميد شيرزی له پلخمري څخه وايي چې د بغلان امنيتي وضعه ډېره خرابه ده او هره شېبه لا خرابېږي. شيرزی وايي چې د دغه ولايت مختلفې برخې په پرله پسې توګه د طالبانو لاسونو کې لوېږي.
که څه هم د تېرې جمعې په ورځ د کورنيو چارو وزير د بغلان ولايت ليدنه کړې وه، خو رسنۍ وايي چې هغه د لنډې موده له پاره په ولايت کې و او څو شېبې يې له رسنيو سره خبرې هم وکړي. حميد شرزی وايي چې د کورنيو چارو وزير له خپلو څرګندونو ها خوا د ژورنالېستانو پوښتنې ځواب نه کړې او رسنيزه غونډه يې ژر پای ته ورسوله.
د طلوع نيوز ژورنالېست زياتوي چې د بغلان د ولايتي شورا غړي پر تاج محمد جاهد توندې نيوکې کوي او وايي چې که وزير د جګړې د مهار کولو له پاره پلان نه لاره، د هغه د راتلو اړتيا نه وه.
رسنۍ وايي چې بغلان ولايت ته د کورنيو چارو وزير، تاج محمد جاهد له سفر وروسته امنيتي وضعه لا خرابه شوې او له دې وروسته طالبانو څو نورې پوستې هم نيولي دي.
