د ولسمشر د دوهم مرستیال سرور دانش له لوري د ملي دفاع وزارت او ملي امنیت ریاست لپاره نوي مسوولین ولسي جرگې ته د اعتماد د رايې اخیستلو لپاره وروپېژندل شول.
دانش د ولسمشر وینا د ولسي جرگې غړو ته واوروله او له هغې وروسته یې معصوم ستانکزی د ملي امنیت ریاست د مشر او جنرال عبدالله خان د ملي دفاع وزارت لپاره معرفي کړل.
دانش همداراز د ولسي جرگې له غړو مننه وکړه چې تېرو نوماندانو ته یې د اعتماد رایې ورکړې او هیله یې ښکاره کړه چې د دې دوو مهمو امنیتي پوستونو لپاره هم د اعتماد رایه ورکړي.
دانش زیاته کړه چې هېواد کې امنیت وضعیت له ډېرو ننگونو سره مخ دی او باید دغه دوه مهمې ادارې ژر تر ژره مسوولو کسانو ته وسپارل شي.
دانش همداراز زیاته کړه چې د دې نوماندانو انتخاب به د هېواد په امنیتي وضعیت کې ښه والی راوړي.
