د ننگرهار د خوږياڼو ولسوالۍ په کږې بازار کې نن سهار يوې چاودنې شپږ تنو ته مرگ ژوبله اړولې ده. چاودنه د سړک د غاړې بم له چاودلو رامنځته شوې ده، چې له امله يې يو تن وژل شوي او پينځه نور ټپيان دي.
د پېښې قربانيان ټول د يوې کورنۍ غړي دي او د دريو حالت يې د اندېښنې وړ ښودل شوی دی. ټپيان د جلال اباد روغتون ته لېږدول شوي دي.
د پېښې عيني شاهدان وايي، د نعمان پاچا سيمې اوسېدونکي د کږې بازار څارويو منډيي ته روان و، چې پاچا کلا سيمه کې پرې ماين وچاود.
د چاودنې پړه تر دې دمه چا پر غاړه نه ده اخيستې.
د ننگرهار د والي وياند عطاء الله خوږياڼي د پېښې پخلی کړی، خو په دې اړه يې څه نه دي ويلي، چې چاودنه د چا له لوري ترسره شوې ده.
