افغانستانسلايډ

کندهار کې مېرمنو ته کتابتون جوړ شوی

کندهار ښار کې لومړی ځل مېرمنو ته کتابتون جوړ شوی دی. د کتابتون نوم حضرت عايشة صديقه دی او نږدې څلورزره بېلا بېل کتابونه په کې ايښودل شوي دي.

د کتابتون پرانسته پرون وشوه چې لسگونو مېرمنو په کې برخه اخيستې وه. کتابتون د خديجة الکبری فرهنگي ټولنې له لوري جوړ شوی. د دې ټولنې مشرې مريم درانۍ د پرانستغونډې پر مهال له ټولو هغو خلکو مننه وکړه، چې کتابتونه ته يې کتابونه ورکړي دي.

اغلې درانۍ زياته کړه، د کتابتون د لا بډايه کولو په پار به يې هڅې روانې وي او نور ديني، علمي، تاريخي، ادبي او… کتابونه به ورته راټولوي، څو ځايي مېرمنې ترې گټه پورته کړي.

درانۍ وويل، د کتابتون نوم يې د اسلام د ستر پېغمبر حضرت محمد صلی الله عليه وسلم د مېرمنې حضرت عايشه صديقه ايښی، چې له دوو زرو ډېر احاديث يې رانقل کړي.

هغې د کندهار پر مېرمنو غږ وکړ، چې په خپل منځ کې د مطالعې فرهنگ عام کړي او خپل بچې ورته وهڅوي.

د غونډې گډونوالو مېرمنو او چارواکو د کتابتون پرانستل يو مهم گام بللی او زياته کړې يې ده، چې په دې سره به د مېرمنو د شعور کچه لوړه شي او له هغو حقوقو به خبرې شي، چې اسلام ورکړي دي.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button