سيمه او نړۍ

چين د دوهم بچي زېږولو اجازه ورکړه

چينايي حکومت په رسمي ډول هغه قانون ومانه، چې له مخې يې کورنۍ دوهم کوچنی زېږولای شي. چين کې له ۱۹۸۰ز راهيسې له يوه د ډېرو کوچنيانو پر زېږولو بنديز لگېدلی و، خو اوس له منځه ولاړ.

چينايي خبري اژانس «شينخوا» ويلي، نوی قانون به د راتلونکې جنورۍ له لومړۍ نېټې پلی شي.

د چين حکومت تېر اکتوبر کې د ۲۰۱۶ او ۲۰۲۰ز کلونو تر منځ هيواد کې د اقتصادي او ټولنيزو اصلاحاتو راوستو په اړه له يوې غونډې وروسته د «يوه بچي» سياست لغو اعلان کړ.

چين کې د «د کورنۍ او اوسېدونکو د پلان جوړونې کمېټې» مخکې ويلي وو، د «يوه بچي» سياست لغو کول به تر ۲۰۳۰ز د چين په نفوس کې ۱،۴۵ مليارد تنه زياتوالی راولي، کمېټې دې ته اشاره کړې وه، چې هيواد کې هر کال ۲۰ مليونه کوچنيان زېږېږي.

چين په ۱۹۸۰ز کې د «يوه ماشوم» سياست رامنځته کړ، څو د نفوس پر ډېروالي ولکه راولي، د دې سياست له مخې ښار مېشتې کورنۍ د دويم کوچني له زېږولو منع شوې، خو په کليوالو سيمو کې دوهم بچي ته په دې شرط اجازه ورکول کېده، چې که لومړی بچی انجلۍ وي.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button