افغانستانسلايډ

پروان: د والي په گډون دولس لوړپوړي چارواکي مسموم شوي دي

د پراون د والي په گډون دولس تنه لوړپوړي چارواکي نن په ولايت مقام کې د يوې امنيتي ناستې په ترڅ کې مسموم شوي دي.

د پروان امنيه قومندان محمد زمان مموزي رسنيو ته ويلي، نن ماسپخين دولس بجې ولايت مرکز کې د يوې امنيتي غونډې په ترڅ کې، چې د ولايتي شورا غړي او امنيتي چارواکو په کې گډون درلود، د والي په گډون دولس چارواکي مسموم شول. د نوموړي په وينا د خونې گرمولو لپاره له گازي بخارۍ گټه اخيستل کېده، چې شايد د بخارۍ د کوم نل د ليک کېدو له امله خونه گازو نيولې وي. مموزی زياتوي، په دې اړه يې پلټنې پيل کړې دي، څو د چارواکو د مسمومېدو لامل معلوم شي.

په مسموم شويو کې د امنيه قومندانۍ امنيتي آمر ضياء الرحمن فايض سيد خيلي، د پروان د ملي امنيت مرستيال، د همغږۍ د مرکز قومندان، د پروان د ولايتي شورا رييس غلام بهاو الدين جيلاني، په پروان کې د ملي اردو ځواکونو قومندان ډگروال لطيف خان او درې نور قوماندانان او ځنې نور کسان شامل دي.

د پروان د عامې روغتيا رييس محمد قسيم سعيدي هم د پېښې پخلی کړی او زياته کړې يې ده، دولس تنه چې زړه بدۍ، گنگستيا او ضعف نيولي وو، د پروان ولايتي روغتون ته وروړل شوي دي، خو د والي محمد عاصم عاصم درملنه ولايت مقام کې شوې ده.

د هغه په وينا اته تنه له درملنې وروسته رخصت شوي، يو کابل ته استول شوی او درې نور لا هم بستر دي.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button