افغانستانسلايډ

پاکستان له امريکايي جنراله د الوتکې د عملې پيدا کولو کې مرسته غوښتې

د پاکستان د پنجاب ايالت د حکومت يوې الوتکې پرون لوګر کې بېړنۍ ناسته کړې او له ناستې وروسته سوځېدلې ده. پاکستاني رسنۍ ادعا کوي، چې الوتکه د طالبانو له لوري سوزول شوې او عمله يې هم هغوی له ځان سره وړې ده.

د پاکستان لوی درستيز جنرال راحیل شريف افغانستان کې د امريکا او ناټو ځواکونو عمومي قوماندان جنرال جان نېکولسن سره تلفوني خبرې کړي دي او د الوتکې د ورکې عملې موندلو کې يې ترې مرسته غوښتې ده.

د پاکستاني پوځ د عامه اړيکو څانګې يا «ايې اېس پي ار» په وينا جنرال نېکولسن د پوځ د مشر غوښتنې ته مثبت ځواب ورکړی او به دې اړه يې د مرستې ډاډ ورکړی دی. سرچينه وايي، جنرال نېکولسن ويلي، چې د ورکې عملې پيدا کولو کې به خپل ټول توان په کار واچوي.
سرچينې دغه راز زياته کړې، چې د پاکستان د پوځ مشر له افغان حکومته هم غوښتي، چې ژر تر ژره د پېښې سيمه کې عمليات وکړي څو د ورکې عملې ژوند ته ګواښ پېښ نه شي.

د پاکستاني رسنيو له راپور سره سم ورکه عمله کې ډېری يې ريټاير جنرالان او يو روسي پيلوټ شامل دي. دغه رسنۍ وايي چې الوتکه د ازبکستان له لارې روسيې ته روانه وه، چې بېړنۍ ناستې ته اړ شوه.

معلومه نه ده چې دا الوتکه د چا له لوري په نښه شوې ده، نه هم وسله والو طالبانو تر دې دمه په دې اړه څه ويلي دي.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button