افغانستان

ولسمشر پاکستان سره د خپلو نږدې اړيکو ننګه وکړه

د ملي وحدت حکومت ولسمشر اشرف غني پاکستان سره د خپلو نږدې اړيکو درلودلو ننګه کړې او په دې اړه يې د ملي امنيت د پخواني رييس رحمت الله نبيل نيوکې رد کړې دي.

ولسمشر غني پاکستان ته د خپل وروستي سفر پر مهال تر ګڼ شمېر نيوکو لاندې راغی، د افغانستان د ملي امنيت رييس رحمت الله نبيل نوموړی له دې امله ګرم وباله، چې پر هغه هیواد باور کوي، چې په ګمان يې د افغانستان په روانو جګړو کې د دولت وسله وال مخالفين حمايه کوي.

خو ولسمشر غني په خپلو څرګندونو کې پاکستان په افغانستان کې د جګړې د پاي ته رسولو په خاطر د سولې خبرو د بيا پيل لپاره مهم شريک بللی، نوموړي نن کابل کې د يوې خبري غونډې پر مهال وپوښتل: «آيا د پاکستان له مثبت ملاتړ پرته به افغانستان کې جګړه لا پسې ونه غځېږي، ځواب راکړئ»؟ هغه زياته کړه: «که چېرې د هيواد د بې ثباتۍ يو لامل زموږ دا ګاونډي هيواد هم دی، نو په ګډه ورسره کار کول يوه هر اړخيزه اړتيا ده، څو روانه جګړه پای ته ورسېږي».

تېره اونۍ پاکستان کې د «اسيا زړه» کانفرانس کې د پاکستان او افغانستان تر منځ هوکړه وشوه، چې ډېر ژر به يو وار بیا د افغان دولت او طالبانو تر منځ خبرو اترو ته د موقع برابرولو هڅې پيل شي، ولسمشر غني هم دې کار ته خوشبيني ښودلې ده، خو د ملي امنيت رييس يې په غبرګون کې خپله دنده خوشې کړه.

ويل کېږي، اشرف غني دغه کانفرانس کې د امريکا د ولسمشر بارک اباما د فشار له امله ګډون وکړ، نوموړي له دې وړاندې د پاکستان له لومړي وزير نواز شريف سره د پاريس غونډه کې له ګډونه هم انکار کړی و، خو وروسته چې د پېښور او کويټې ځينې پښتنو سياستوالو کابل کې هغه سره ليدنه وکړه، غني له نواز سره ليدو ته چمتوالی وښود.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button