افغانستان

هلمند: د نږدې ټولو ولسواليو ادارې تړلې دي

هلمند کې د وسله والو طالبانو د پراخو بريدونو له امله له مرکز لښکرگاه او گرشک ولسواليو پرته د نورو ټولو ولسواليو ادارې تړلې او کارونه يې په ټپه ولاړ دي.

د هلمند د ولايتي شورا د امنيتي کمېټې مشر بشير احمد شاکر پژواک سره خبرو کې ويلي، چې اوسمهال ټولې ولسوالۍ د طالبانو له لوري کلابندې دي او امنيتي سرتېري د ولسواليو له مرکزونو د سنگرونو کار اخلي. دا په داسې حال کې ده، چې د دې ولايت پينځه ولسوالۍ په بشپړ ډول د طالبانو په ولکه کې دي. دغه راز د لښکرگاه ښار څلورمه امنيتي حوزه نږدې له تېر کال راهيسې د طالبانو کنټرول کې ده، چې د امنيتي کمېټې د مشر په وينا چارواکي يې اندېښمن کړي دي.

ښاغلی شاکر زياتوي: «ولسواليو کې ملکي خدمات په بشپړ ډول بند دي، يوازې دولتي ودانې امنيتي ځواکونو سره دي، چې هر وخت تر بريدونو لاندې وي». د هغه په وينا د لښکرگاه ښار ډېری قاضيان د نورو دولتي مامورينو په څېر له ښاره وتلي دي.

د هلمند د ولايتي شورا غړي هم وايي، چې اوسمهال ولسواليو کې خلکو ته د خدمت په نامه هيڅ څه نه شته، روغتونونه او ښوونځي تړلي دي او په هيڅ اداره کې دولتي مامورين نه شته.

بل پلو د هلمند ډېری اوسېدونکي وايي، چې دوی دا مهال خپلې ستونزې وسله والو طالبانو ته وروړي او هغوی يې ورته اواروي.

د هلمند د والي وياند عمر ځواک د يادو چارواکو خبرې تاييدوي، خو په وينا يې امنيتي ځواکونه کوښښ کوي، چې سيمې بېرته له وسله والو طالبانو ونيسي.

سره له دې چې مرکز کابل کې چارواکي د هلمند جگړې ته يوه او بله پلمه گوري، خو د جگړې د غځېدو د لاملونو معلومولو لپاره د ولسمشر غني تللي پلاوي دغه جگړه جعلي او تجارتي وبلله او چارواکي يې تورن کړل، چې د خپلو گټو د ترلاسه کولو لپاره نه غواړي دا جگړه ختمه کړي.

د هلمند جگړه کې تر دې دمه د جگړې د دواړو لوريو او ملکي کسانو زرگونو تنو ته مرگ ژوبله اوښتې او زرگونه کورنۍ کډه کولو ته اړ شوې دي.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button