افغانستانراپورونه

ناټو: که امریکا له افغانستان څخه وځي نو موږ هم ورسره وځو

د ناتو سرمنشي ويلي، افغانستان ته د تګ پرېکړه له متحدینو سره په ګډه شوې او د راتلونکیو بدلونونو په اړه به هم پرېکړه په ګډه کوي.

له هغې وروسته، چې ولسمشر ترمپ په راتلونکي کریسمس کې له افغانستان څخه د ځواکونو پر ایستلو ټینګار څرګند کړ؛ ینس ستولتنبرګ په بروکسل کې له خبریالانو سره په خبرو کې ویلي، چې افغانستان ته د تګ پرېکړه له متحدینو سره په ګډه شوې او د راتلونکیو بدلونونو په اړه به هم پرېکړه په ګډه کوي.

ینس ستولتنبرګ ویلي؛ کله، چې مناسب وخت راشي، په ګډه به راوځوو.

د امریکا د ملي امنیت پخوانی سلاکار مک ماستر د افغانستان په اړه د امریکا پر تګلاره نیوکه کوي او وایي، چې په واک کې د طالبانو شریکول مناسب کار ندی.

د نوموړي د څرګندونو له مخې؛ خلک غواړي، چې جګړې پای ومومي او ځواکونه له افغانستان ووځي. مونږ اوس په افغانستان کې په یوه له لیونتوب څخه په ډک حالت کې یو؛ هغه دا، چې مونږ د افغان دولت پر ضد د طالبانو شریکان یو.

مک ماستر ویلي، د طالبانو او القاعده یارانه هم اوس تر پخوا لا ژوره شوې ده.

مک ماستر وایي؛ مونږ په افغانستان کې ځانته دښمن جوړ کړ. اوس د القاعده او طالبانو تر منځ څرګنده کرښه شتون نلري. دا افسانه یې دښمن یعنې طالبان اوس د ۱۹۹۶ او ۲۰۰۱ کلونو په پرتله ډېر ډارن دي.

د امریکا او طالبانو تر منځ د سولې هوکړه لیک له مخې، امریکایي ځواکونه باید په څوارلس میاشتو کې له افغانستان ووځي؛ خو که ترمپ خپله پرېکړه عملي کړي، له طالبانو سره به له کړې هوکړې څخه پېنځه میاشتې مخکې دا کار کوي.

ورته مطالب

Back to top button