افغانستانسلايډ

مدني فعالانو پر چارواکو د برېښنا پرې کولو گواښ وکړ

د مدني ټولنو يو شمېر غړو نن حکومتي چارواکو ته گواښ وکړ، چې که دريو ورځو کې يې د کابل برېښنا جوړه نه کړه، د دوی د کورونو برېښنا به پرې کړي.

مدني فعالانو نن کابل کې د يوې خبري غونډې پرمهال وويل: «کابل يوازينۍ پلازمېنه ده، چې اوس وخت کې برېښنا نه لري».

يو تن مدني فعال فايز عظيمي گواښ وکړ: «که چارواکو تر راتلونکې دوشنبې د برېښنا د سمولو لپاره جدي گام پورته نه کړ، د ولسمشر او اجراييه رييس د کورونو برېښنا به پرې کړي».

د غونډې گډونوالو گواښ وکړ، چې که حکومت يې غوښتنو ته پاملرنه ونه کړه، له مدني عکس العمل سره به مخ شي.

د کابل برېښنا درې اوونۍ وړاندې بغلان کې د جگړې پر مهال د يوې ستن نړېدو له امله پرې شوې ده، چې لا هم بېرته نه ده نښلول شوې.

چارواکو د ستن له نړېدو وروسته ډېر ژر د برېښنا د تارونو نښلولو ژمنه کړې وه، خو دا چې د ستن سيمه د وسله والو په ولکه کې ده او حکومتي ځواکونه يې لا هم په نيولو نه دي توانېدلي، برېښنا همداسې پرې ده.

د ستن نړولو پړه دولت پر وسله والو طالبانو اچولې ده، خو طالبان وايي، ستن د ملي اردو د توپونو په ډزو نړېدلې ده.

د برېښنا شرکت کارکوونکي وايي، تر څو يې چې امنيت نه وي تامين شوی، تر هغه يادې سيمې ته نه شي تلای.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button