افغانستانسلايډ

طالبانو هلمند کې لسگونه کسان دولت سره د تړاو په شک نيولي

وسله والو طالبانو تېره شپه د هلمند د گرشک ولسوالۍ اړوند مهاجربازار سيمه کې د لارويانو یو ۳۰۳ موټر او دوه لارۍ برمته کړي دي. ويل کېږي ۳۰۳ موټر کې له دېرشو تر پنځوسو کسان سپاره وو. پېښه د هرات – کندهار پر لويه لار رامنځته شوې ده.

د گرشک امنيه قوماندان محمد اسماعيل خپلواک رسنيو سره خبرو کې ويلي، چې طالبانو نن سهار مهاجر بازار سيمه کې دوه ټېلر موټر او يو د مسافرو بس له ځان سره نامعلوم لوري ته وړي دي. نوموړی وايي، دغه موټر له هراته کندهار ته روان وو چې اوسمهال يې د پوليسو له لوري د خلاصون عمليات پيل شوي.

طالبانو د پېښې پړه پر غاړه اخيستې او پر خپله رسمي پاڼه يې ليکلي، چې گرشک ولسوالۍ کې يې تېره شپه له درې موټرو مشکوک کسان د تحقيقاتو لپاره کوز کړي دي. هغوی د ټولو برمته کړيو کسانو شمېر اووه ويشت تنه ښودلی.

طالبانو ادعا کړې، چې د کره استخباراتي معلوماتو پر اساس يې دغه کسان نيولي او پاتې نورو مسافرو او موټرانو ته يې د تگ اجازه ورکړې. هغوی زياته کړې ده، چې نيولي اووه ويشت تنه يې د لا زياتو تحقيقاتو لپاره خوندي ځايونو ته لېږدولي دي.

طالبانو پر خپله خبرپاڼه څرگنده کړې، چې د دې کسانو په اړه به تحقيقات ډېر ژر بشپړ شي او «بې گناه» کسان به بېرته خوشې او «له امنيتي ارگانونو سره تړلي کسان به د اسلامي امارت محاکمو ته وسپارل شي».

دا په داسې حال کې ده، چې وروستيو ورځو کې د کندز او بغلان په گډون ځينو ولايتونو کې طالبانو سره د بايو ميټريک سيسټم د شتون خبر ورکړل شوی، چې له مخې يې دولتي کسان معلوموي، خو دولتي چارواکي دغه خبره ردوي.

Tags

Related Articles

ځواب دلته پرېږدئ

ستاسو برېښناليک به نه خپريږي.

Back to top button