افغانستان

د کندز د ملي امنیت لوړ پوړي چارواکي له دندو لرې شول

ولسمشر اشرف غني د کندز د ملي امنیت رییس او یو شمېر نور لوړ پوړي چارواکي په دندو کې د غفلت له کبله ګوښه کړل.
ولسمشر غني د کندز له سقوط ورسته نن سهار د دوهم ځل لپاره دغه ښار ته ولاړ.

هغه کندز ته له ورتګ سره د ملي امنیت رییس د وظیفوي غفلت او د دغه ولایت د سقوط پر ورځ له دندې څخه د غیاب په تور ګوښه کړ او جنرال بیګ يې د کندز د ملي امنیت سرپرست رییس په توګه وټاکه.

ولسمشر همدا راز څو ولسوالان او یو شمېر نور ولایتي چارواکي له دندو ګوښه کړل.

طالبانو د روان کال د تلې د میاشتې په شپږمه نېټه د یوه پراخ برید پر مټ د څو ساعتونو په ترڅ کې د کندز ستراتيژيک ښار ونیو.
په تېرو ۱۴ کلونو کې د افغان حکومت پر ضد دا د طالبانو تر ټولو ستره بریا وه. د کندز سقوط په نورو ګاونډیو ولایتونو پراخه اغېز وکړ، چې له کبله یې طالبانو د څو ورځو په ترڅ کې شاوخوا ۱۱ ولسوالۍ ونیولې.

کندز دوه اونۍ د طالبانو تر واکمنۍ لاندې و. په پای کې طالبانو خپل شاتګ او له حکومتي ځواکونو سره جګړه «بې ګټې» وبلله.

 

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button