افغانستانسلايډ

د ولايتي شورا غړی: د روزگان ټولې ولسوالۍ سقوط سره مخ دي

د روزگان د ولايتي شورا يوه غړي خبر ورکړی، چې د وسله والو طالبانو د پراخو بريدونو له امله د ولايت ټولې ولسوالۍ له سقوط سره مخ دي.

محمد ظاهر نادري وايي، چې طالبان هره ورځ نوې سيمې تر ولکې لاندې راولي او دولتي ځواکونه په ټاکليو ځايونو کې راټولېږي. د هغه په وينا دولت دومره ځواک نه لري، چې طالبانو ته ماتې ورکړي.

ښاغلی نادري زياتوي، چې د روزگان له نيمو سيمو څخه پر ډېره ځمکه د طالبانو ولکه ده او په نيمو سيمو کې هم درنې جگړې روانې دي. دا په داسې حال کې ده، چې امنيتي چارواکو څه موده مخکې روزگان کې د پرمختگ او د وسله والو د په شا تمبولو ادعا کړې وه.

د روزگان د والي وياند دوست محمد ناياب د ښاغلي نادري خبرې رد کړې دي او وايي، چې امنيتي ځواکونو تېرو څو ورځو کې ډېرې سیمې بېرته له طالبانو نيولې دي. نوموړی زياتوي: «سمه ده چې د طالبانو له لوري درنې جگړې روانې دي، خو د اندېښنې خبره نه شته او د ټولو ولسواليو واک امنيتي ځواکونو سره دی».

د روزگان خلک بيا د والي د وياند خبرې ناسمې بولي او په وينا يې د گڼو ولسواليو لويې لارې اوس هم د جگړو له امله بندې دي، چې دولت يې په مياشتو مياشتو په خلاصولو نه دی توانېدلی.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button