افغانستان

د شيرخان بندر صادرات نيم په نيمه کم شوي

د کندز د سوداگرۍ او صنايعو خونې چارواکو خبر ورکړی، چې سوداگرو له دې ولايته خپلې شتمنۍ ويستلې دي، چې له امله يې د شېرخان بندر صادراتو کې نيم په نيمه کمی راغلی دی.


شېرخان بندر تاجکستان سره په پوله د هيواد مهم بندر دی، چې د افغانستان او منځنۍ اسیا د هيوادونو تر منځ صادرات او واردات ترې کېږي.

د کندز د سوداگرۍ او صنايعو خونې د صادراتو مدير «مسعود وحدت» ازادۍ راډيو سره خبرو کې ويلي، پانگه وال له دې ولايته په تېښته دي، چې د کندز اقتصاد ته يې زيان پېښ کړی. «کندز کې شاوخوا څلور سوه ملي او نړيوال سوداگر فعال و، خو اوس يې خپل فعاليتونه کم کړي دي». ښاغلی وحدت دا ستونزه د نا امنیو له کبله بولي.

دا په داسې حال کې ده، چې د کندز چارواکو پرون پر حکومت غږ کړی، که يې ژر تر ژره دې ولايت کې د طالبانو ضد عملیات و نه کړل، طالبان به نږدې راتلونکې کې يو ځل بيا ښار ونيسي.

ولسمشر غني درې مياشتې وړاندې کندز ته د سفر پر مهال ژمنه کړې وه، چې درې اوونۍ وروسته به هلته عمليات پيل کړي، خو د کندز د والي په وينا د هلمند وروستيو حالاتو امنيتي ځواکونه هلته بوخت کړل او د کندز عمليات وځنډېدل.

د کندز د سوداگريو او صنايعو خونې د صادراتو مدير سږکال د شيرخان بندر له لارې صادرات پنځوس سلنه کم ښودلي، چې په وينا يې دولت، سوداگرو او د کندز خلکو ته لويه اقتصادي ضربه ده.

د کندز سوداگر هم له دې ولايته د تېښتې لامل ناامني او جگړه بولي، چې دوی نه شي کولای خپلې کورنۍ او مالونه هلته پاتې کړي.

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button