سلايډسيمه او نړۍ

د داعش وياند ابو محمد عدناني وژل شوی

د داعش ډلې وياند او مشهوره څېره ابو محمد عدناني د امريکا په يوه هوايي بريد کې وژل شوی دی. د داعش اړوند رسنيو د دې خبر پخلی کړی او په دې اړه يې يوه اعلاميه خپره کړې ده.

د اعماق په نوم داعش ته نږدې خبري اژانس څرگنده کړې، چې عدناني د سوريې په حلب ښار کې د جگړې پر مهال وژل شوی دی.

عدناني د داعش مهم کس بلل کېده چې د دې ډلې په استازيتوب يې اغېزناک بيانونه کول. هغه په ټوله نړۍ کې پر «جهادي» ډلو غږ کاوه چې داعش سره يو ځای شي، يا دې د مخالفت په صورت کې د دې ډلې دښمنۍ ته تيار شي.

امريکا د عدناني د وژلو د خبر پخلی کړی او زياته کړې يې ده، چې عدناني يې په يوه هوايي بريد کې په نښه کړی دی. د امريکا د دفاع وزارت يوه چارواکي رسنيو ته ويلي، چې د سوريې الباب ښار گوټي کې يو موټر په نښه شوی او له منځه وړل شوی دی.

داعش ډلې د نوموړي د انتقام اخيستو گواښ کړی: «پليتو او ډارنو صليبيانو او کفارو ته د هغوی د تباهۍ زېری ورکوو». دغې ډلې ټينگار کړی چې د عدناني په وژلو به د ډلې پلويان لا ډېر شي.

عدناني څو ځل د خپلو ږغيزو پيغامونو له لارې افغانستان کې هم پر خپلو پلويانو غږ وکړ، چې د «خلافت» د ټينگښت لپاره جگړې ته زور ورکړي او هر څوک يا ډله يې چې مخې ته ودرېږي، له منځه دې يې يوسي. داعش جگړه مارو د راپيدا کېدو په لومړيو کې د افغانستان په ختيځ ولايت ننگرهار کې ځينې سيمې لاندې کړې، خو وروسته د طالبانو او حکومتي ځواکونو د سختو بريدونو او جگړو له امله تر ډېره محدود شول او لا هم هلته خپل فعاليت کوي.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button