پاموړ

د بازار موندنې لس زرینې کیلي ګانې

ژباړن: عطا محمد میاخېل

که چېرې تاسو پلورنکي یاستئ، یا دا چې تولید لرئ او یا هم دې ته ورته په بل کار باندې بوخت یاستئ، نو په ډاډ سره ویلی شم، چې د خپلو توکو د پلور له پاره مو هرو مرو طرحه جوړه کړې ده، البته که دا طرحه مو لیکل شوې نه وي، نو حتماً د دې مهم امر (خرڅلاو) له پاره مو په خپل ذهن کې برنامې لرئ، که چېرې لاندې لس ټکي، چې د زرینو کیلي ګانو په توګه ترې یادونه شوې ده، په پام کې ونیسئ، نو د بازار موندنې او پلور په برخه کې مو بریا ته رسولی شي .

لومړۍ کیلي

د محصولاتو او خدماتو په زیاتولو سره، چې وړاندې کوئ یې، ځان د ناڅاپي بدلونونو له خطر څخه وژغورئ، دغه راز کولای شئ د بازار موندنې او خرڅلاو د بېلابېلو لارو چارو په لرلو سره د ناڅاپي بدلونونو له خطر څخه هم خوندي پاتې کېدای شئ. له دې هرڅه سره، که چېرې کوم بدلون را منځته شو د بېلګې په توګه نوی سیال بازار ته داخل شو یا د مشتري په سلیقه کې بدلون راغی، نو تاسو به یوازې د خپل بازار یوه کوچنۍ برخه له لاسه ورکړې وي، ټولې سوداګرۍ ته مو د پام وړ زیان، نه اوړي .

دویمه کیلي

له خپلو مشتریانو سره تل په اړیکه کې اوسئ؛ د محصولاتو او خدماتو د پراختیا په لټه کې واوسئ، چې کولای شي، ستاسو د مشتریانو د رضایت او خوښۍ سبب شي . په هغو کسانو باندې د توکو پلورل، کوم چې مخکې یې له تاسو څخه خرید کړی وي، د هغو کسانو په پرتله ډېر ساده او آسانه دی، کوم چې له تاسو څخه یې تر دې دمه توکي، نه وي اخیستي.

درېیمه کیلي

له درواغجنو ادعاوو څخه په کلکه ډډه وکړئ، د مثال په توګه: هېڅکله داسې مه وایئ، چې موږ په نړۍ کې تر ټولو غوره یو ! حتی که دا ادعا سمه هم وي، غوره ده چې له یادې ادعا څخه کار وانخلئ، ځکه چې دا د دې لامل کېږي، چې مشتریان ستاسو په رښتینولۍ باندې شکمن کېږي او ستاسو خرڅلاو له خطر سره مخامخ کېږي. هڅه وکړئ، چې له منطقي او باوري شعارونو څخه ګټه واخلئ .

څلورمه کیلي

له خپلو ادعاوو څخه په عددي ډول کار واخلئ. د بېلګې په توګه: زموږ محصولات د بازار په پرتله لس سلنه ارزانه دي، البته دا ادعا باید په عمل کې هم ثابته شي . دا ډول شعارونه د باور وړي دي او د مشتري په ذهن باندې ډېره ښه اغېزه لرلی شي .

پنځمه کیلي

له رقابت پرته د یوه ځانګړي استثنایي پلور د رامنځته کېدو له پاره د ځانګړو کمښتونو، امتیازونو او ارزښتمنو ډالیو له ترکیب څخه ګټه واخلئ، معمولاً یوازې کمښت د خرڅلاو د چټکتیا لامل نه کېږي، بلکې غوره ده، چې پر کمښتونو سر بېره له قرعه کشۍ، د ډالیو له ورکړې او دې ته ورته نورو لارو چارو څخه د مشتریانو د زیاتولو له پاره کار واخلئ.

شپږمه کیلي

هڅه وکړئ، چې تل خپل څو ډوله محصولات ځانګړي خرڅلاو ته وړاندې کړئ او د هر یوه له پاره یې د خرڅلاو د پای نېټه وټاکئ، کله چې د ځانګړي پلور نېټه پای ته ورسېده، نو پر ځای یې نوی محصول وړاندې کړئ، په دې کار سره نه یوازې نوی محصول وړاندې کوئ، بلکې تل به مناسب خرڅلاو ولرئ .

اوومه کیلي

که چېرې ستاسو محصولاتو او خدماتو د ډېرو مشتریانو پام ځانته را واړاوه، نو هېڅ ګټه به مو نه وي کړي، په هغه صورت کې چې هغوی ستاسو د محصولاتو د اخیستلو توان ونه لري، په داسې یوه حالت کې غوره ده، چې خپل بازار بدل کړئ او هغه مشتریان پیدا کړئ، چې ستاسو د محصولاتو د پېرلو توان ولري . د محصولاتو د ښه خرڅلاو بله لاره د هغو اخیستونکو له پاره، چې د پېرلو بشپړ توان نه لري د بیو راټیټول دي . دا کار کولای شي، د محصولاتو د ګټې او یا هم د کیفیت د راټیټولو له لارې ترسره شي، خو غوره داده، چې د کیفیت پرځای د ګټې کچه راټیټه شي .

اتمه کیلي

له خپلو رقیبانو ځان جلا وښیئ او د خپلو رقیبانو په نسبت د یوه نسبي ښه والي په رامنځته کولو سره د مشتریانو په ذهن کې خپل نوم ته ځای پیدا کړئ، البته ستاسو امتیازونه او غوره والی باید په داسې ډول وي، چې د رقیبانو په وسیله مو د تقلید وړ نه وي .

نهمه کیلي

د یوې غوره پایلې د ترلاسه کولو له پاره، د خبرتیاو او تبلیغاتو متن په داسې ډول ولیکئ، چې هر لیدونکی او اورېدونکی داسې فکر وکړي، چې دا خبرتیا یوازې او یوازې د ده له پاره ده؛ د لیکلو پرمهال په داسې متن فکر وکړئ، چې دا خبرتیا یوازې د یوه کس له پاره لیکئ، نه یوې ډلې خلکو له پاره . دا موضوع مرسته کوي، چې ستاسو خبرتیا ځانته عامیانه حالت غوره کړي، له وچ او رسمي حالت څخه بهر شي .

لسمه کیلي

معمولاً وروستی خرڅلاو د پلورونکي او پېرونکي په لومړۍ لیدنه کې نه ترسره کېږي، له همدې امله، غوره ده چې داسې یو سیستم جوړ کړئ، تر څو د هغو مشتریانو په اړه معلومات تر لاسه کړئ، کوم چې تر اوسه یې له تاسو څخه څه نه دي اخیستي، تر څو له هغوی سره په پرله پسې توګه په اړیکه کې واوسئ او په دوامداره توګه هغوی د خپلو محصولاتو اخیستلو ته لېوال کړئ، په دې کار سره به ډېر هغه کسان، چې تر اوسه یې له تاسو څخه خرید نه دی کړی، ستاسو د محصولاتو په مشتریانو بدل شي .

Tags

ځواب دلته پرېږدئ

ستاسو برېښناليک به نه خپريږي.

Back to top button