خبرونهسلايډسيمه او نړۍ

تهران: د شیعه عالم د اعدام په غبرگون د سعودي سفارت سوځول شوی

د ایران په پلازمېنه تهران کې پارېدلو لاريونوالو د سعودي عربستان سفارت ته اور ورته کړی. ایراني رسنۍ وايي چې لاریونوالو په سعودي کې د شیعه دیني عالم، شیخ نمر النمر اعدام پارولي. ایراني لاریونوال تېره شپه په تهران کې د سعودي سفارت ته ننوتي او د سفارت اسناد یې له بامه راغورځولي.
ایرنا، د ایران دولتي خبري اژانس وايي چې پولیس توانېدلي چې د سفارت له ودانۍ لاریونوال لرې کړي او «نظم واکمن وکړي». همداراز ایرنا د ایران د بهرنیو چارو وزارت د یوه چارواکي له قوله لیکي چې دا خبرونه د «تایید وړ نه دي» چې گواکې له سعودي څخه دې د ایران سفیر شړل شوی وي.
د ایران د بهرنیو چارو وزارت د شیخ نمر د اعدام په تړاو په تهران کې د سعودي د دیپلوماتیک ماموریت مرستیال احضار کړی. ایران سعودي ته د شیعه دیني عالم د اعدام په تړاو خپل احتجاج رسولی. د ایران د بهرنیو چارو وزارت مرستیال وايي چې سعودي په سیمه کې د ترهگرۍ د خپرولو عامل دی. د ده په خبره، سعودي په دې اعدام سره «ستراتيژيکه غلطي» وکړه.
ایران د نمر د اعدام په تړاو په لومړني غبرگون کې ویلي و چې سعودي به یې «لوړه بیه پرې کړې».
شیخ نمر النمر د جمعي په ورځ او پاتې نور ۴۶ کسان د شنبي په ورځ اعدام شول.
ایران او سعودي په سیمه کې له ۱۹۷۹ راهیسې له یوه بل سره په رقابت اخته دي چې «سړه جگړه» بلل کېږي.

Tags

ځواب دلته پرېږدئ

ستاسو برېښناليک به نه خپريږي.

Back to top button