خبرونهسيمه او نړۍ

ترکیه: له روسيې بخښنه نه غواړو

ترکيې یو ځل بیا ټینګار کړی چې د روسۍ الوتکې د غورځولو پر اړه له دغه هېواده بخښنه نه غواړي.

د ترکيې لومړي وزیر احمد داوود اوغلو نن هیله څرګنده کړله چې روس به د دغې پېښې وروسته په ترکیې باندې په لګېدلو اقتصادي بندیزونو یو ځل بیا غور وکړي.

تېره ورځ د روسيې ولسمشر ولادیمیر پوتین د یوه فرمان له لارې پر ترکیې د اقتصادي بندیزونو غوښتنه وکړله. دغه هېواد پر هغو ترکي شرکتونو محدودیتونه وضع کړل، چې په روسیه کې کار کوي.

ترک لومړي وزیر داوود اوغلو نن دوشنبه، خبریالانو سره د خبرو پر مهال وویل چې «موږ خپل مسوولیت ادا کړی، ځکه ترک ولسمشر او لومړی وزیر په دغه پېښې بخښنه نه غواړي».

د ناټو د مشر سره تر کتنې وروسته ترکي لومړي وزیر زیاته کړه چې ترکیه په اینده کې د دغه ډول پېښو څخه د ځان ژغورلو په خاطر له روس سره خبرو اترو ته تیاره ده.

بل پلو د روس بهرنیو چارو سلاکار ویلي چې روسي ولسمشر ویلادمیر پوتین د ترکيې ولسمشر د تلیفون ځواب نه دی ورکړی ځکه هغه له ترکیې غوښتي چې په دغه پېښه بخښنه وغواړي.

روس ټینګار کوي چې د دوی جنګي الوتکه د ترکیې هوايي حریم ته نه ده داخله شوې.

یوه اونۍ وړاندې ترکيې هغه روسۍ جنګي الوتکه راوغورځوله چې د ترکيې هوايي حریم ته ننوتې وه.

ترکیې ویلي وو چې روسۍ جنګي الوتکه ایس یو ۲۴ ته د دوی لخوا په پنځو دقیقو کې ۱۰ ځل اخطار ورکړل شو خو هغوی ونه مانه.

ترکي ولسمشر رجب طیب اردوګان د پېښې وروسته وویل چې ترکیې قصدا روسۍ الوتکه نه ده په نښه کړې.

په عین حال کې روسي ولسمشر بیا د ترکیې لخوا د دوی د الوتکې غورځول د «د شا لخوا پر چاړه وهلو» سره مشابه کړ او ګواښ يې وکړ چې دغه پېښه به د ماسکو او انقرې په اړیکو بد اغېز وکړي.

Tags

ورته مطالب

ځواب دلته پرېږدئ

ستاسو برېښناليک به نه خپريږي.

Back to top button